Am Mäntigmorgä fahred 6 wanderfreudigi
( und au meh oder wachi! )Naturfründ richtig Glarnerland. Umstiege in Ziegelbrugg und Schwande und dänn bringt euis d Verchehrsbetrieb Sernftal bis zu dä Skihütte Obererbs.

Dä Himmel isch na bedeckt aber äs isch troche!

Nach em wohlverdiente Kaffihalt mached mir euis dänn gmüetlich uf dä Wäg Richtig Ämpächli. Äs isch sehr angnehm zum wandere.

Ä wunderbari Ussicht begleitet euis uf äm ganze Wäg.

Nacheme Stundehalt fangt dänn s'Rate a… mir gsehnd
d Tschingelhörner .. aber wo isch s berüehmti Martinsloch?

Mir gsehnd än helle Fläcke, aber das chönnti au äs Schneefäld sy? Au mit äm Fäldstächer simmer nöd ganz sicher!

Iheimischi bestätiged eusi dänn aber eusi Vermuetig, äs isch tatsächli s Martinsloch. Will dä Himmel halt bedeckt isch, gseht alles wyss us. Scho na imposant, vor allem i öppe acht Wuche schient d Sunne dänn au scho s letscht Mal uf d’Chile vo Elm für das Jahr!

So ä schöns Dorf aber ebe… au mit vill Schatte bis so mitti März.

Die herrlichi Bergwält begleitet euis bis zur Bergstation Ämpächli wo sich bi euis dänn au dä Hunger mäldet.

Mir verpfläged euis und für die meischte gits au na äs Dessert bevor mer mit äm Gondeli nach Elm gondeled!  Bald scho chunnt euise Bus und mir fahred gmüetlich wieder heizue!

Äs isch än schönä und gmüetliche Tag gsy und au dä Reto isch no wach worde!
S’Wätter hät super mitgspillt !

Danke liebi Naturfründ für d’Begleitig uf derä schönä Wanderig!

Bis zum nöchschte Mal!

Mit eme herzliche Berg-Frei

Brigitte