D Wanderleiteri isch us äm Winterdomizil in Flims zrugg und au parat… Aber statt
d’ Früehligsusrüschtig hämmer halt nomal die warme Chleider montiert!

5 Natürfründ händ sich a däm chüehle und füechte Morgä z’Wetzike am Bahnhof troffe. Chuum fanged mer a laufe chömmed ä paar Rägetropfe wo euis wänd verschrecke!

D’Regina montiert ihri neue Rägehose, die müend ja teschted werde! Aber ebe… äs hört au scho bald wieder uf mit äm Räge und mir laufed los Richtig Hinwil.

Äs gaht än chüehle Wind und näbed dä erschte Früehligsblueme findet mer au na Schneereschte im Wald. D Temparature ladet nöd zum absitze i und drum simmer zimmli zügig underwägs!

 In Hinwil wärmed mer euis dänn im Kaffi Steiner wieder uf, det stosst dänn au dä Reto no zu euis, er isch gmüetlich mit äm Zug cho und er hätt sogar s Kaffi gfunde!

Äs feins Zvieri dörf nöd fehle! Mir händ äs riesigs Wätterglück gha, will chuum sitzed mer a dä Wärmi  rägnets zimmli fescht!

Äs isch ä churzi aber gmüetlichi Wanderig gsy und mer fahred guet verpflägt und gueter Luune heizue!

Danke mine tolle Wanderkamerade für d Begleitig!

Mit eme herzliche Berg-Frei

Brigitte