Was für än wunderschönä Morgä, äs isch für d Organisatorin schön wämmer so sichers Wätter hät für ä Wanderig!

Z’ vierte simmer am Morgä am siebni z Züri gstartet. Mer sind nöd ellei underwägs…. Aber mir händ immer äs Plätzli gfunde im Zug!

Im Hasliberg gits dänn zerscht emal än Kaffihalt bevor s dänn obsi gaht! Äs isch au da obe warm und dä Ufstieg hänkt scho grad ächli a! Aber zum Glück isch äs numme äs churzes steils Stuck und dänn gahts meh oder weniger gradus oder ab und zue auch chli ufe und abe! Wanderer hätts nöd so vill underwägs, die meischte sind glaub mit eme Bähnli obsi gange!

Am Badsee mached mer ä churzi Trinkpause bevor mer vor äm Zmittag nomal ächli laufed! Biner schöne Füürstell chömmer Picknicke, äs isch wieder emal gmüetlich dusse ufeme Bänkli z’ässe!

Nach dere wohlverdiente Pause nämmed mer dänn no s’letschti Stuck in Agriff, äs wird immer wärmer und äs zieht sich dänn doch nachli bis in Brünig füre! Besser mer würdi d Zyte uf dä Wägwieser nöd aluege…. Aber mir sind immer na munter underwägs und freued euis uf ä schöni Terrasse inere Beiz!

Und die chunnt dänn au, mir werded sehr fründlich und schnäll bedient und mir händ meh als ä Stund Zyt bis euise Zug fahrt! Richtig ä erholsami, gmüetlichi Pause!

Am Vieri fahred mer dänn wieder heizue, zum Glück isch äs agnehm chüehl im Zug!

Mir vier chömmed wieder guet z’Züri a und dänn heisst’s no ganz heigah und ab under d’Duschi!!

Danke villmal für eui Begleitig, isch än super schöne Tag gsy!

Bis zum nöchschte Mal !

Äs herzlichs Berg-Frei

Brigitte